Deu 25 | NdeIBE | STEP | Nxa amadoda exabana, ingxabano yawo kumele isiwe emthethwandaba ukuze kuthi abehluleli bakhuphe isinqumo ngaleyondaba, bakhulule omsulwa njalo bamlahle olecala.

Deuteronomy 25

1 Nxa amadoda exabana, ingxabano yawo kumele isiwe emthethwandaba ukuze kuthi abehluleli bakhuphe isinqumo ngaleyondaba, bakhulule omsulwa njalo bamlahle olecala. 2 Nxa olecala kufanele atshaywe, umahluleli uzakuthi kalale acambalale athi katshaywe ekhona laye ngalezonswazi ezilingene lelocala, 3 kodwa akufanelanga zedlule ezingamatshumi amane. Nxa etshaywe izinswazi ezedlula lapho, umfowenu usezabe esuswe isithunzi emehlweni akho.

4 Ungafaki inkabi yakho isayeke nxa ibhula amabele.

5 Nxa amadodana endoda ehlala kwenye indawo omunye abe esesifa engelandodana, umfelokazi akumelanga ayekwendela kwenye indawo. Umfowabo wendoda kumele amthathe anyanise laye ukuze agcwalise umlandu womfowabo kulowomfelokazi. 6 Indodana yakuqala ezazalwa lapho imele ibizwe ngomfowabo owafayo ukuze ibizo lakhe lingakhohlakali ko-Israyeli.

7 Kodwa-ke, indoda nxa ingafuni ukuthatha umfazi womfowabo, kuzamele umfazi lowo aye ebadaleni esangweni ledolobho afike athi, “Umfowabo wendoda yami uyala ukuqhuba ibizo lomfowabo ko-Israyeli. Kafuni ukuthi agcwalise umlandu womfowabo.”

8 Ngakho abadala balelodolobho lakhe bazambiza bakhulume laye. Nxa angala kokuphela esithi, “Angifuni ukumthatha,”

9 umfelokazi lowo uzamqonda phambi kwabadala, bamkhuphe inyathelo elilodwa, amkhafulele emehlweni athi, “Mpthu! Lokhu yikho okwenziwa endodeni engafuniyo ukuvusela umfowabo indlu yakhe.” 10 Usendo lwaleyondoda ko-Israyeli luzakwaziwa njengaBendlu engelaNyathelo.

11 Nxa amadoda amabili esilwa kube sekusithi umfazi wenye yalamadoda athelele ancedise indoda yakhe, abesexhakalaza leyondoda ngamaphambili, 12 kumele liqume isandla sakhe owesifazana lowo. Lingabi lesihawu kuye lakancane.

13 Ungabokuba lezilinganiso zesisindo ezimbili emgodleni wakho ezahlukeneyo – esinye esinzima lesinye esilula. 14 Ungabi lezilinganiso ezimbili ezehlukeneyo endlini yakho esinye esikhulu lesinye esincinyane.

15 Kumele libe lezilinganiso eziqondileyo leziqotho loba ngezesisindo loba ngezobukhulu, ukuze libe lempilo ende elizweni uJehova uNkulunkulu wenu alinike lona.

16 Ngoba uJehova uNkulunkulu wenu uyanengeka ngomuntu owenza lezizinto, yiloba ngubani owenza izinto zobuqili.

17 Khumbula okwenziwa ngama-Amaleki kuwe endleleni uphuma eGibhithe.

18 Kwathi lapho usudinwe kakhulu ungaselamandla, akuhlangabeza ehambeni lwakho abachitha bonke ababesalela emuva; ayengamesabi uNkulunkulu. 19 Mhla uJehova uNkulunkulu wakho ekunika ukuphumula kuzo zonke izitha zakho ezikuhanqileyo elizweni akunika lona ukuba libe yilifa lakho, uzakhohlwa nya ngokwama-Amaleki ngaphansi kwezulu. Ungakhohlwa!